Siklòn Irèn (Irene) Frape Pòto Rico: Li Supoze Frape Il Ispagnola (Repiblik Dayiti ak Repiblik Dominikèn)

Siklòn Irèn (Irene) Frape Pòto Rico: Li Supoze Frape Il Ispagnola (Repiblik Dayiti ak Repiblik Dominikèn)
Premye siklòn sezon an rele Irèn. Li s-on siklòn kategori 1. Li vini ak anpil lapli ak van ki kraze poto electrik ak kèk kay. Mwatye nan kay Pòto yo pa gen elektrisite. Otorite Pòtorikèn yo poko di si gen moun ki mouri.
Daprè anpil rapò meteyolojik, Irèn gen pou-l frape Repiblik dominikèn ak Repiblik Dayiti. Lè nou sonje gen plis de 600,000 Ayisyen ki pa gen kay pou pare fòs ak sekous siklòn nan, nou panse pral gen anpil moun k-ap mouri an Ayiti.
Antouka, otorite Ayisyèn yo ap demele yo pou distribye enfòmasyon epi bay moun abri pandan pasaj
siklòn nan. Moun ap monte desann. Y-ap fè pwovizyon. Y-ap achte flash ak manje. Moun ki gen lajan
ap fè sa, men gen anpil moun ki pa gen anyen. Yo pa gen kòb. Y-ap tann manje sinistre ke anpil
òganizasyon entènasyonal distribiye. Si gen siklòn, amplwaye òganizasyon sa yo pa ka sòti. Si yo soti, yo
pa ka ale lwen.
Antouka, n-ap gade pou-n wè ki kalite dega Irèn pral lakòz an Ayiti.
Antretan, Pòtoriken yo ap fè netwayaj nan peyi yo.

Nouvel Sezon Siklòn an Ayiti

Siklòn Emily Ap Frape Ayiti: Alèt Wouj Pou Tanpèt Twopikal, Lapli ak Inondasyon an Ayiti ak Repiblik Dominikèn
Moun k’ap viv nan tant ak joupa an Ayiti ap bay tèt yo traka paske siklòn Emili ap pwoche il Ispayola a. Sant Nasyonal k’ap veye siklòn nan Mayami di anpil lapli ap tonbe sou Ayiti ak Repiblik Dominikani. An Ayiti, lapli konsa ka koze anpil moun mouri.
Depi tranblemandetè ki ti kraze Pòtoprens ak anpil lòt viv ak kominote, moun ap viv nan tijoupa ke nenpòt gwo van ka bwote al jete nan ravin. Pi gwo pwoblèm Ayiti se kesyon lavalas. Mòn yo pa gen pyebwa pou bare dlo k’ap degrengole desann anba nan laplèn yo. Dlo ki soti mòn Boutilye ak tout lòt mòn ki antoure Ayiti pral kraze kay ak tant kominote entènasyonal la te bay Ayisyen. Inondasyon, lavalas vin tounen yon gwo pwoblèm preske pou tout peyi-a. Tout Ayisyen ap soufri konsekans debwazman tèt mòn yo.
Otorite Ayisyèn yo ap mande tout moun pou kite kote ki konn pran dlo yo. Pou evakye moun, Yo voye mesaj bay Ayisyen sou tèks epi telefòn selulè. Yo voye avèti yo.
Lapli kontinye tonbe sou pliziyè rejyon nan peyi. Rejyon Nò peyi-a tankou Atibonit, Kap Ayisyen, Plato Santral etsetera resevwa plizye santimèt lapli.
Sèvis Pwoteksyon Sivil Nasyonal fè yon bon travay pwoteje popilasyon sivil la.
Sanble ke pèp Ayisyen pran yon ti souf paske pa gen anpil dega ki rive fwa sa-a. Otorite prezante yon rapò de yon moun ki te blese.
An nou sonje ke sezon siklòn nan, ki te kòmanse nan mwa jen, ap fini nan fen novanm.